- Advertisement -

أسباب الحب العشرة كتبه امانى زيان

  • أول سبب وأهم سبب .. أن كل طرف بيكون عنده إستعداد للحب ، أي والله .. بمعنى أنه زهقان .. عنده فراغ عاطفي ، إنسى فكرة سهم الحب وكيوبيد ، لا لا ، الفكرة هنا الصدفة . اتنين اتقابلوا كل واحد عنده استعداد لعلاقة حب ، وهنا تبدأ الحكاية .
  • السبب الثاني .. الخروجة ، الولد عايز بنت تتعلق في ايده ويخرج مع اصحبه اللي بيخرجوا كابلز ! والبنت بالاضافة لخروجة الكابلز هي بتكون زهقت انها بتدفع لنفسها طول الوقت !! حاجة تضايق وضغط مادي رهيب .
  • الثالث .. الخناقات ! أيوة ، إحنا بنكون محتاجين للخناقات في الحب ، ماتصلتيش ليه قبل ماتنزلي ! ماهيتاب عاملالك لايك على البوست اللي انت بتشتمني فيه ليه ؟ !! لابسة الفستان الأخضر ليه ؟ انت مش مهتم ، كل الكلام ده رغم تفاهته لكن لما نحب .. بنحب نعمله .. هي دي الشطة وبهارات العلاقة الناجحة .
  • الرابع .. كيد ، أي نعم ، أنا أرتبط عشان أسبق وأغيظ صاحباتي اللي مارتبطوش ، أو أفرس صاحبتي اللي لسة مفركشة .. والولد عايز يكيد البنت اللي رفضته ، أو صاحبه اللي كن مصاحب من شهرين وكان بيغيظه ويقوله : هو انت في قردة هتبصلك ؟!
  • الخامس .. نلاقي كلام نقوله .. بمعنى إنه يكون في حكاية نحكيها وإحنا مع أصحابنا ، والفكرة مش أي حكاية ، جرب تتكلم عن شغلك !! مفيش حد هيسمعك وكله هيفضل باصص في موبايله ، لكن أول ماتقول ، أما امبارح حصلي موقف مع صاحبتي ! أو اسكتوا مش اتخانقت امبارح مع صاحبي !! كله هينتبه ويحط الموبايل على الترابيزة ويبرق منتظر يسمع !
  • السادس .. المواصلات .. مين هيودي ومين هيجيب وده طبعا بالنسبة للبنت ، حبيبي عايزة اروح لصاحبتي جنبي هنا ممكن تيجي توديني ؟ حبيبي ماما عايزة لوبيا من كارفور ممكن تيجي معايا ، وهكذا .. بالنسبة للولد بقى جيبيلي كذا وانت جاية ” وطبعا مش هتحاسب ” ، ممكن تعدي على مصر الجديدة وانت جاية من فيصل للهرم !! طبعا هي هتقول آه ماتقدرش تقول لأ، وممكن جدا اول ما تديله الحاجة يجيله تلفون ان عمه مات فيضطر يسيبها ويروح يعمل الواجب .. لأنه راجل صاحب … واجب .
  • السابع .. الهدايا .. دي أهم سبب للحب والعلاقات ، لدرجة أن في ناس بتبقى عايزة ” تفركش ” لكن يؤجلوها لبعد عيد الميلاد ، بعد الذكرى الأولى للإرتباط ، بعد عيد الحب ، ياخد الهدية ويتكل على الله ، الهدايا مابقتش زي زمان ، ورد ودباديب ، لا ، بقت أقل هدية وبتكون منتقدة كمان ، تبدأ من ألف جنيه .. ودي الهدية الواقعة .. فأكيد كله لازم يدور على الحب .
  • الثامن .. التجربة .. لازم يكون عندك تجارب ، مش معقول ومش منطقي ومش مرغوب أنك تكون أو تكوني ماعندكش تجارب !! خام يعني !! معقول ! كدة يبقى أكيد في مشكلة وتثير حولك الشكوك والإشاعات .
  • التاسع .. السينما .. منظر مش لطيف أبدا لو دخلت انت وصاحبك السينما ! او انت وصاحبتك ! لازم تروح انت كرجل مع بنت والعكس ، فيلم رومانسي ، رعب ، مش فارقة المهم انك تلاقي اللي تدخل معاه السينما وتقول بثقة ” آخر صف لو سمحت ” لأن انتوصاحبك لو عملتوا كده .. هتلاقوا الراجل بيبصلكم بشكل في ريبة وشك !!
  • العاشر والأخير .. التلفون ، ترغي مع حد في التلفون ، وتخلص عليه الباقة ، وتتكلم وانت وسط أصحابك وهيموتوا يسمعوا كلمة ما يعرفوش !! تتكلم من 8 بليل ل8 الصبح ! بتقولوا ايه ماحدش عارف ولا متوقع ! وده كل يوم !! عشان كدة لو حصلت المعجزة وكللتم العلاقة بالزواج بتصابوا بالخرس الزوجي ! هتجيبوا كلام تاني منين ؟!!