- Advertisement -

أشكال نفسنة البنات كتبته أماني زيان

 تبقى صاحبتك ويمكن كمان أنتيمتك ، واكلين شاربين متمرطين مع بعض ، وأول ما الولد الحلو اللي كنتم بتتكلموا عليه ييجي يكلمك انت ، فجأة وبقدرة قادر ، الولد هيبقى .. بيئة وولبسه وحش ، وعنيه مخاصمة بعضها ! هتسأليها : إزاي يا بنتي ده انت كنتي إمبارح بتقولي انه ” قطعة ” ، تقولك أنا ؟! ، ده كنت بقول على البواب !! أي كلام ، وتبدأ تقارنه بناس عشان تحسسك أنه ولا حاجة ، يعني توم كروز ، ظافر العابدين ، اللي هم مش موجود منهم غير قطعة في الحياة ، وتبدي تنفخ فيكي ، انت تستاهلي أفضل من كدة ، انت so good to be true !! أول ما تبعدي عنه ، هتعدي قدامك وايدها في ايده !!

  • لو حصل واتخطبتي يا أستاذة قبل صاحباتك ، هتلاقي اتنين ثلاثة كده تاني يوم إعلانك الخطوبة على الفيسبوك ، وداخلة عليهم ، هيبصولك كأنك قتلتي أمهم ، أو أبوهم ، وانت يا عيني داخلة مبتسمة والحياة ملونة ، دخلتي في ظلمة فجأة ، هتلاقي واحدة بتقولك وهي رافعة حاجب : إتخطبتي ؟! .. سكيتي كدة ؟! ولا كأن عندك أصحاب مستنيين اليوم ده عشان يفرحولك !! طبعا الكلام طالع بنبرة صوت مرعبة ، هم أصلا أصحاب شغل وهم عارفين كدة ، بس فجأة العشم بيقتلهم ! انت هتحاولي تبرري ، وتوعديهم أنه الفرح كله هيحضره ، هيقاطعوكي ” الفرح !! آه .. ربنا يتمم على خير يا حبيبتي ، وامتى بقى الفرح ” ،” قريب ” ، ” كمان قريب ” ، طيب يا حبيبتي ” ، ناقص بس يقولك يا شابة !!
  • نزلتي صور الخطوبة أو فرحك على الفيسبوك ، هتلاقي ناس داخلة ، مبروك وقلوب ودباديب ، هتلاقي واحدة كدة طالعة ” مبروك بس امتى ؟ ، أو مبروك اوي موت خالص .. خسي بقى عشان الفرح !” في بقى واحدة مش هتبارك أصلا مش هتقدر يا عيني بس هتدخل على الخاص ، ” انت عرفتيه ازاي ؟ كدة على طول ، واحدة تانية هتقولك ” عنده أصحاب نضاف ؟ ، واحدة هتقولك بس ده مش تيبك !! في الفترة دي هتلاقي دايما باقي أصحابك بيتكلموا .. ويسكتوا أول ما تدخلي .. فترة النبذ .. استحمليها .. هتعدي .
  • هتحبي طبعا طبعا تقابليه بأصحابك ، من باب أنه يتعود عليهم ومن ناحية تانية تغيظيهم ، ” انت كمان مش سهلة ” ، المهم ، انت طبعا مش واخدة خوانة ، هتلاقي فجأة كل المصايب اللي نجحتي أنك تخبيها طول عمرك بتتعرض قدامه وكأنها بتتعري واحدة واحدة على العمود !! وتغمزي وتشاوري وتبرقي .. مفيش فجأة نزل عليهم غباء قاتل ، وهو طبعا كل قصة يحكوها يقوم باصص لك بصة طبعا وانت تلوني ألوان الطيف ، طبعا هو هيمشي ويقولك جالي ظرف .. ونتكلم بكرة .. هتعاتبي أصحابك هيردوا ” ايه ده إيه ده !!! هو معقد ولا ايه يا بنتي عاااادي هو مش فريش ليه ؟!!”
  • لو خطيبك شخصية مش مناظر ، يعني شكله ملعبك حبتين ، مكعبر شويتين ، وانت طبعا موافقة عشان شخصيته مش عشان هتموتي وتتجوزي قبل صاحباتك وخلاص لا سمح الله ، هيفرحوا فيكي فرحة ، هتلاقيهم دايما بيتوشوشوا ويضحكوا انت طبعا هتشكي انهم بيضحكوا عليه وتحاولي تكذبي نفسك ، لا طبعا هم بيضحكوا عليكي ، لا وفرحانين فيكي كمان ، انت لسة هتشكي؟! ، انت تستاهلي لأنك أول ما اتخطبتي كلمتيهم واحدة واحدة وقلتي لهم ” يلا عقبالكم بقى ، ربنا كبير “!
  • من أهم جمل النفسنة والله هو أعمى ، أو هي عملاله عمل ، ده يستاهل أحسن منها ، أو ربنا خد منها كل حاجة واداها الواد الحكاية ده ، كل المبررات اللي يحاولوا جاهدين يبرروا فشلهم في الحصول على شاب بمقومات متكاملة زي صاحبتهم !
  • الدلع والمياصة الغير مبررة أمام صاحبك من صاحباتك نوع برضه من النفسنة ، عشان يوصلوا له بطريقة غير مباشرة رسالة ” انت فايتك كتير ، واللي إخترتها دي شاويش الليل “
  • في الشغل برضه في نفسنة كتير ، لقيتي شغل يبقى حاجة من اتنين ، اما أن باباكي أو عمك أو خالك اتوسط لأنك غبية ومستحيل تنجحي في أ مقابلة شغل لوحدك ، أو أن أنت إستخدمتي أنوثتك وأنها طرق يأبى أدبهم وأخلاقهم أنهم يستخدموها !!
  • لو نجحتي في شغلك ، هيكون لنفس السببين السابقين ، أو لأنك متسلقة اتسلقتي على أكتافهم !! رغم أنهم هم نفسهم فاشلين ! بس مايجراش حاجة .
  • لو اتجوزتي بقى … دي هتكون ضربة في ماسورة النفسنة الأم ! إنت كدة بتتحديهم ، إنت كدة عديتي كل الحدود ، وعديتي المسموح وكسرتي حاجز المسكوت عنه ! يا أستاذة أيام مش هتعدي أولا فرحك هيبقى وحش والبوفيه ” عرة ” وأهل العريس فلاحين ، وانت شخصيا فستانك بلدي وأمك مش طايقة العريس ، والمأذون لابس بدلة !! ايه علاقة ده بالموضوع ماتفهميش ! بس هو كدة .
  • هتيجي بعد أسبوع من الجواز ، هيقولولك ” لا أنت وشك شاحب ، مالك مطفية ليه يا حبيبتي ؟” لو شهر عسلك في مصر هتاخدي تريقة للصبح ، لو برة مصر ، يبقى ليه الإسراف ده ؟ انتوا مش عاقلين وحياتكم كلها هتبقى ديون وبلاوي !
  • حملتي من تاني شهر ، ليه كدة انت هتشيلي الهم بدري ليه انت عايزة تربطيه ؟ هو عايز يفك منك ولا ايه ؟، أجلتي ، يبقى برضه ليه ؟ هو انت مش حاسة بالاستقرار ولا ايه ؟ هو اللي مش عايز ؟ طيب حماتك موافقة ؟ هو انت بتكدبي وعندك مشاكل في الحمل ؟، ممكن جدا يطلعوا اشاعة انك مولودة من غير رحم أصلا !!
  • خلفتي وانت بتشتغلي ، لا لازم تسيبي الشغل هو انت هتقدري ، لو قررتي تقعدي من الشغل ، لا هيتحكم فيكي وهتبقي شوال وهيتجوز عليكي !!
  • النفسنة لها أبعاد كثيرة ، خلي بالك ، انت بتحققي .. إذن أنت مستهدفة ، ومش عارفة الضربة جاية منين !!!