- Advertisement -

أماني زيان تكتب “خميس حامل يا جماعة !!” | حلقة جديدة من يوميات زوجة سعيدة جداً

فات شهرين على الحمل وحالتي بقت صعبة جدا .. هموت من حاجتين .. كُتر الأكل وقلة الحركة .. بس أنا لما سألت قالولي أن طبيعي عندنا في مصر !! وخصوصا زيادة الوزن .. اللي أنا مش فاهماه هو أني بطني أنا بتكبر من الحمل لكن خميس بطنه بتكبر ليه ؟!!

والله أنا حامل في الثاني هو حامل في الخامس !!

بعد ما أعلن نظام التقشف بقي ياكل أكثر من الأول وكرشه بيكبر كأنه داخل معايا في منافسة .. أنا قلت مش مشكلة أهو نخس مع بعض بعد الولادة ورضيت وسكت .. ألاقي ياحضرات في يوم قايمة أروح الشغل وبلبس ومضايقه مفيش قميص راضي يقفل عليا وأنا صحفية يعني بنزل و ألف وأدوار يعني لازم البس واسع عشان أقدر أتحرك .. واقفة بقي قدام المرايا وزهقانة وهو كان بيلبس رايح شغله فبقول له ” الحقني ياخميس أعمل ايه مفيش ولا قميص بيدخل فيا !!

” البس تيشرت وفوقيه القميص مفتوح ” , لا طبعا ياخميس مقدرش إنه المنظر دة ؟!!

هو بقي لابس تيشرت لأن هو كمان القميص مستحيل يقفل علية ولابس تشيرت وفوقيه القميص وزي الفل ” .. بصت له .. ومش راضية أكسفه وأقول له أنه تخن قوي .. ” حلو ياحبيبي بس أنا مش بحب ألبس الإستايل دة طيب بص ده يادوب قفل أهو ايه رأيك حلو” ” يابنتي أصل مش هينفع تلبيس القميص محزق وكرشك طالع منه كده بصيت له بنرفزة .. ” والله .. طيب أنا كرشي طالع عشان أنا حامل لكن أنت كرشك طالع كدة ليه ومن مين !! ” بص علي نفسه في المرايا وبصلي ” أنا عندي كرش ؟!! وشفط بطنه علي الأخر وحزم التيشيرت ” أهو فين دة .. فين ” ضربته علي بطنه عشان يبطل شفط وحزقت التيشيرت علي كرشه ” أهو .. أهو حمل في الخامس ده ولا أنتفاخ ولا تعتبره ايه ؟!! .. شد نفسه مني .. وهو مضايق بس بيضحك برضه ” سيبيني ايه انت مالك وبعدين أنا راجل الشكل مش مهم .. لكن انت كست عيب في حقك لما تبقي كدة ” فكرني ببتاع النكته بتاعت السكران اللي ماشي ورا ست وعمال يقولها ياوحشه ياوحشه راحت لافة وقايل له بس ياسكران قالها طيب أنا سكران هنام وأقوم فايق لكن انت هتنامي وحشة وتصحي وحشه ” فضل باصص لي مش فاهم طبعا ” أنا الراجل السكران ياحبيبي و أنت الست الوحشة ” هز كتافه وبصلي بقرف وقف يظبط نفسة قدام المرايا ويسرح شعره وقعد يلف عامل فيها باليرينا !! ” أنا نازل .. وهدومي .. علي مقاسي .. !! بصيت له بقرف فجأة لقيتة بيبص علي بطني ويصقف ” حسن زعبلة ماشي بيتسلي .. محزقه الجاكتة وبيتعايق بالفلة أه ياعيني ” رحت ماسكة الفوطة وجريت وراه لغاية لما خرج من الشقة جري ..” ” يا أماني أستني أنا بالشبشب ” .. ” والله ماأنا فاتحالك ياسمبتيك ياغصن بان , روح شغلك بالشبشب ” .. ” أماني افتحي .. ما تهزريش فتحت ” نعم ” .. مابحبش الهزار دة وبعدين أنا مهندس محترم أروح شغلي بالشبشب ” ؟!! دخل لبس الجزمة وطلع بيضحك ..وبصراحة وأنا كمان .. الأغنية لايقة عليا قوي قفلت الباب ولقيت نفسي ببص علي كرشي وبغني ” حسن زعبلة ماشي بيسلي محزق الجاكتة ومتعايق بالفلة .. ” !!!