- Advertisement -

أماني زيان تكتب “رمضان كريم لكن خميس لأ !!” | حلقة جديدة من يوميات زوجة سعيدة جداً

طبعا كلكم عارفين إني أخدت أجازة بدون مرتب ، وبرضه مش عاجبه ، وبقي عايش في دور حبوب البن، طول اليوم يقول لك أنا مطحون .. أنا مطحون !!

ويقُر عليا ، انت قاعدة ولا علي بالك ، هو إنت بتعملي إيه ، مأنتخة ، ومرة كانت خناقة لما دخل لقاني انا وثريا قاعدين علي الكنبة بنتفرج علي التليفزيون في التكييف .. دخل يقول ” ايه ده .. ايه ده ” وبيبصلي بصه واحد شاف مراته في حضن واحد ثاني ماكنتش فاهمة في ايه ؟!!

” حرام عليكم ، مشغلين التكييف .. ليه .. ليه هو أنا مرتشي ؟! هو أنا حرامي ؟!

هو انا مش بني أدم ؟! ” ايه علاقة اللي هو بيقوله بالتكييف معرفش بس عادي ..

” ياخميس في ايه.. الجو حر ” يبرق لي بغيظ ” خففي هدومك ياستي ، البسي أقطان ” طبعا فكركم بالمرحوم هشام قنديل بتاع الكوتونيل !! أنا كمان افتكرت وضحكت لقيته راح قايل ” أكل ومرعي وقلة صنعة ” وكانت خناقة انتهت انه اعتذر لدرجة انه طلب مني أرجع الشغل لو عايزة .. أنا كنت فاكرة أنه عايز يرضيني أتاريه عايز يرضي نفسه ، لقي المصاريف كتير .. وزادت مصاريفي اللي ما كنتش محملاه ولا مليم فيها ، حتي حاجاتي الخاصة جدا اللي المفروض بتيجي مع حاجة البيت ماكنتش برضي أخدها منه ، ولما كنت بجيب حاجة بسيطة ماكنتش باخدها تاني ، طبعا كل ده يعني أصبح  فوق راسه بالإضافة لمصاريف ثريا ..

ورمضان داخل وأنا طبعا .. طبعا مش علي مزاجة وهسيبة يتحمل مسؤلية اختياره ، وانا مرتاحة وبكتب كتاب دلوقتي اسمه ” يوميات زوجة سعيدة جدا ” فا ليه بقي انزل الشغل وأعطل نفسي ؟! عشان هو يبقي سعيد !! مثلا !! بعينه ..

النهاردة كتبت الورقة اللي كلكم عارفينها ، الطويلة قوي دي .. ورقة الطلبات بتاعة الشهر الكريم .. الورقة متقسمة كالآتي .. أربع عزومات ” أهلي وأهله ، أصحابي ، أصحابه ” ممكن يبقوا عزومتين لكن في النهاية هترسي علي نفس الطلبات ، مكسرات الشهر كله و الياميش ، والطلبات العادية بتاعة الشهر لحوم وفراخ وبط وحمام وصدور رومي وسمبوسة وغيره ، كتبت الورقة وحطيتها له بعد العشا ،، ” خميس .. دي ورقة رمضان هاتها بكرة او بعده  عشان في حاجات هتبلها وأخزنها عشان العزومات ” ..

خد الورقة وهو بيقولي ” ياه رمضان جه بسرعة كدة ، رمضان كريم ” بص في الورقة وعينه بتوسع زيادة ، والغريب ان مناخيره كمان كانت بتوسع مش عارفه هو هيتحول ولا إيه !!

رفع عينه من علي الورقة وبص لي ” انت ايه اللي انت كاتباه ده .. هو انا .. .. “قاطعته وقلتله ” حرامي ، مرتشي ، مش بني أدم أصلا ” سكت وبص لي بإستغراب ” ايوة .. هو انت فاكراني ايه ” .. ” أولا يا حبيبي نفسي اسألك ايه علاقة المرتشي والحرامي والحيوان ” .. ” أنا ما قلتش حيوان ” ، بصيت له باستغراب ” أيوة مش بني آدم هتبقي ايه نبات ؟! المهم يعني ايه علاقة ده بكل مرة بطلب منك فيها طلب ؟! هو الإنسان العادي خالص مش بيفتح التكييف ، مش بيجيب طلبات البيت ،  مايجبش ياميش رمضان “

” لا البني آدم العادي ياهانم  مش بيجيب كل ده ، الرحمة فين ، العدل فين ، طالبة نص ك فزدق انت عندك فكرة ان كيلو الفزدق ب500 جنية وعين الجمل ياهانم ب500 جنية طالبة صنوبر !! انت مجنونة !! هو أنا تاجر مخدرات ؟! ، ثم ايه الصنوبر دة أصلا بيتعمل بيه ايه”  رديت في هدوء ” كوبيبة ” ، ” اسكتي انتي بتردي عليا كمان ، كبيبة ايه البتاعة الي انا بطلعه من بقي أرميه دة ب1000 جنية الكيلو طالبه ربع كيلو انت خلاص مالكيش كاسر ؟! “

قمت وقفت وحطيت ايدي علي بقه ” بس .. بس انت عندك فلوسوفوبيا ” بص لي وشال ايدي من علي بقه ” ايه عندي ايه ” ، ” فلوسوفوبيا ، أي حاجة فيها فلوس بيجيلك هلع وبيجيلك بانيك أتاك بيطلع علي هيئة قلة أدب وطولة لسان “

 طبطبت عليه وخدته في حضني وهو العجيب مستسلم ” ما تخافش الشهر هيعدي بسلام ، ما تخافش العزومات هتبقي كويسه ..ماتخافش مش هنشحت  .. ” قام زي المجنون تاني ” وايه لازمة كل العزومات اللي انت كتباها دي .. ها .. ايه لازمتها ” ، ” أهلك وأهلي”، ” أهلي هيعزوموني مش عايزين يتعزموا”، ” ياحبيبي ما يصحش ” ، ” لا ، أنا أهلي مراعين ظروفي ، لكن شوفي انت أهلك اللي ما بيراعوش ظروف حد ولازم ياخدوا عشان يدوا ” قمت تاني حطيت ايدي علي بقة  حاسة اني مرة هحطها على بقه ومناخيره عشان نخلص ” شفت ، أهي النوبة جت لك تاني ” أخدته وطبطبت عليه ” وأصحابك ياحبيبي وأصحابي ” بص لي باستغراب ، “أنا معنديش أصحاب ” ، ” شفت ، شفت  كرم ربنا أهي عزومة اتلغت أهي .. وايه لازمة أصحابك ، عمري ما شفت منهم خير ، مفيش غير تريقة وضحك وقلة .. .. “

حطيت ايدي علي بقه وأخدت منه الورقة وطبطبت عليه

” حضر الفلوس اللي تقدر تدفعها وأنا هتصرف ” هدي وسكت .. راح باصلي وانا باخد الورقة ” أنا هدفع 300 جنيه ” بصيت له بصه هو فاهمها كويس وقلتله

” خميس انا عندي فصالوفوبيا ها .. اتقي شري .. حضر 3 ألاف جنيه ونص وأنا هتصرف في الباقي ربنا يهديك جه يفتح بقه ” ها .. فصالوفوبيا .. مش عايز أقولك أعراضه سكاكين وغطيان حلل  وسواطير وبلاوي .. تصبح علي خير .. أخدت ثريا ودخلت .. رمضان كريم ..