دليلك الوحيد في فهم المدير الجديد

 جرت العادة ان يكتب الجميع عن كيفية تدريب الموظفين الجدد و كيفية اعداد برامج تدريبية توجه المديرين و الرؤساء في كيفية قيادة و توجيه الموظف الجديد ، ولكن ، لم اقرأ كثيرا عن نصائح أو ارشادات تساعد الموظف البسيط في كيفية التصرف عندما يتم  تعيين مدير جديد لادارته او القسم الذي يعمل به؟

كيف يفهم شخصية المدير ، و كيف يطلع المدير الجديد على الاساليب الحقيقية التي تجري بها الامور و الاعمال في الادارة بل و في الشركة عموما ، بغض النظر عما سيقال له رسميا من لوائح و قوانين، غالبا لا تطبق!لهذا قررت ان افتح اناهذا الموضوع الشائك ، و أدخل عش الدبابير،لمساعدة الموظف الغلبان وأوجه كلام هنا له:

 شوف يا عزيزي الموظف امامك موقف من اتنين، يااما ستنتهز الفرصة عشان يعرف المدير الجديد قيمتك  طول العمر ، قصدي طول ماهو مدير، و يرد لك الجميل كل سنة”وقت المكاقأةو التقييم ” فتتصدر انت قائمة. الترقيات و الحوافز و الذي منه . يا اما هتوفر مجهودك وتقول انه ممكن يكون مش من النوع اللي بيطمر فيه، و هتكون انت ضيعت وقتك وجهدك ساعتها علي الفاضي، وهو اللي هيقبض و يكبر و انت عمرك ما هتبقي المدير!

وبالعكس ممكان تحبط اكتر لما ييجي اخر السنة و ما يفكرش يعمل لك اي زيادة علي اعتبار انك كنت بتقوم بشغلك، عادي يعني!! انا دلوقتي هاساعدك تتطلع من الحيرة دي و تفهم مديرك من اول شهر و توفر علي نفسك المجهود اللي مالوش لازمة.العملية كلها ممكن تقسيمها لمرحلتين؛ مرحلة ما قبل التعيين، ، مرحلة بعد التعيين , شهر بالكتيرالموضوع كله محتاج منك بس شوية تركيز مش اكتر و تسمع الكلام بحذافيره

 ١- مرحلة ما قبل التعيين

عادة في كل شركة، لما بيستقيل مديرك او يترفد ،اخيرا بيتم تشكيل لجنة من المديرين لاستقبال طلبات التعيين الجديدة،و فحصها و تصفيتها. و عادة بيتصفي اغلب اللي ما لهمش ضهر في اللجنة، ، و بيفضل اربع خمس مرشحين من قرايب او اصحاب اعضاء اللجنة. وممكن يكون فيه واحد او اتنين ما قدرش اعضاء اللجنة انهم يطلعوه في التصفيات الاولية لان مؤهلاته جبارة . بس ما تقلقش هي دي المرة الاولي و يمكن الاخيرة اللي ممكن يتفق فيها اعضاء اللجنة انهم هيلاقوا العيب المثالي في المرشح اللي هيفسد عليهم احلامهم ووعدهم اللي هيتفانوا في تحقيقها.
اولا:   دورك في المرحة دي، هو دور اي باحث علمي مخلص؛ (جمع المعلومات) ايوة لازم تحاول علي قد ما تقدر و تركز كريس.في جمع المعلومات و كل القيل و القال اللي هيطلعه اعضاء اللجنة علي المرشحين اللي مش من طرفهم. اسمع الكلام دة كويس ، و مش لازم تصدقه، لانه غالبا هيكون كلام متعارض و غير منطقي بس خليه في بالك. ممكن ينفع بعدين. عادة سيتم الاستعانه باحد زملائك لترتيب عملية المرشحين التلاتة اللي هيفضلوا للاخر، و غالبا مش منهم ابو مؤهلات جبارة.
ثانيا: اهتم و ابذل قصاري جهدك انك انت اللي تكون مسؤول عن ترتيب المقابلات دي، او واحد صاحبك اوي هو اللي يرتبها، او واحد لازم تصاحبه اوي
ثالثا:  اهتم بكل تفاصيل هذه المرحلة
1- تبدأ المرحلة عند الاتصال بالمرشح او مراسلته لتحديد موعد وتفاصيل المقابلة.
الاتصال دة او المراسلة دي ،و لو كان بالايميل، هيكشفلك حاجات كتيرة جدا و مهمة جدا.
بداية من طريقته في تلقي المعلومات منك مثلا ، هتقول له انه “تم تحديد موعد المقابلة في اليوم…. ، الساعه كذا،،،، و ستقوم بمقابلة إعضاء اللجنة، يلي ذلك ، التعرف علي زملاء العمل و مقابلة رئيس مجلس الادارة”
2- رد المرشح
هنا في غاية الاهمية، ركز في طريقة تلقيه المعلومات و الاهم نوع الاسئلة اللي هيسألهالك.. في مرشح مثلا ممل هيسألك في كل التفاصيل اللي ما خطرتش علي بالك، لحد ما يزهقك من اول اتصال، في مرشح تاني هتلاقي ردوده مختصرة و فيها قنزحة كدة من قبل ما يبقي مدير، في مرشح ممكن يسألك اسئلة عن حاجات مادية دقيقة زي “يا تري لو اتعينت هيبقي لي بدل مواصلات، او بدل سيارة؟ و كام؟ ” صدقني ده بيحصل ساعات من اول اتصال.
  •   احرص علي ان تتواجد يوم المقابلة ؛ عشان طبعا الانطباعات الاولي مهمة، مظهره، طيبته، تكشيرته، بخله، كرمه، قنزحته،…. كل دي حاجات ممكن تحسسها من المرة الاولي، الي حد كبير.
طبعا موضوع مؤهلاته او كفاءته دي حاجة لازم تعترف انك مش هتقدر تحكم عليها من الاول، و مش هتفرق معانا كتير، المهم هو الشخصية.
  •  لازم تعرف كمان انطباع كل الناس اللي هيقابلها في هذا اليوم المشهود ، عشان تتأكد من انطباعاتك، و تطعمها بتفاصيل اكتر. واخيرا حاول برضه تعرف اذا كان من النوع اللي بيفاوض في المرتب و لا عنده حياء في النقطة دي، بيجمع نمر تليفونات زملاء المستقبل و لا في حاله ، بيحكي تفاصيل حياته لكل شخص بيقابله و لا تقيل و بيسمع اكتر ما بيتكلم .كل دي تفاصيل هتفيدك، اذا كان المرشح دة هو سعيد الحظ المدير الجديد، و تعرف تعامله بطريقته ، بدل ما تعك الدنيا من اولها.
 ٢- مرحلة ما بعد التعيين
بعد تعيين المدير الجديد، اول حاجة هيعملها،عادة، بعد ما يكون شرب سر الخلطة من المديرين الكبار ، اللي قعد معاهم عشان يعرف طريقة تسيير الاعمال و اللوايح و القوانين في الشركة، انه يعمل اجتماع للادارة اللي هيديرها ، و هيقول طبعا ان بابه مفتوح للكل و…  كل حاجة هيقولها في الاجتماع دة، ارميها ورا ضهرك، لانه كلام اسطوانات بيقوله كل مدير جديد. المهم هنا هو طريقته في التعامل و اللوك اللي عايز يظهر به امام الموظفين. لانه عادة هيكون علي العكس تماما
 اللي عايز يأكد علي انه طاهر اليد، يبقي حرامي، و اللي عايز يظهر بمظهر ولاد الذوات اللي واخد علي العز، دة محدث نعمة، و قس علي هذا و اخيرا اقدم لك تصنيف ملخص
:لاغلب المديرين  و طريقة التعامل مع كل صنف
١- المدير البخيل:   دة لازم تنجح انك توري له مصلحته من كل طلب انت عايزه لك او للادارة ، لانه لو لم يجد اي  مصلحة، تأكد انه مش هيوافق علي اي طلب بل  بالعكس هيشغلك ساعات اضافية ببلاش و هيستخسر اي دقيقة يشوفك قاعد فاضي فيها.
٢- المدير الخواف؛   دة دايما خايف من الناس اللي فوق و مش هيعمل اي حاجة ممكن تكون احتمال تضايقهم. فلو عايز تطلب اي حاجة، يبقي لازم تخليه يتأكد بكل الادله ان دة هو طلب الناس اللي فوق و دة اسلوبهم في الادارة اساسا
٣- المدير المطيع: في الاول هيكون مطيع للمديرين الكبار ، بس تقدر تسحبه كمان ويه و تخليه مطيع ليك ، قبل ما حد يسبقك و يسيطر عليه.
٤- المدير العقلاني   اللي بيوزن كل كلمة، دة لازم تعمل له ميزان من حسنات و سيئات  اي طلب.
٥- المدير المهزوز؛   يعني اللي كلمة توديه و كلمة تجيبه، دة لما تدخل له بطلب، لازم ما تتطلعش من عنده غير لما يمضيلك بالموافقة عليه. ما تديلوش فرصة يفكر و يتهز في رأيه.
بعد ما عرفت انواع المديرين و طريقة التعامل مع كل مدير، حاول انك توصل لفهم شخصية المدير في اسرع وقت ممكن ، قبل ما هو يفهمك و يفهم اللي حواليه، عشان تفضل انت في وضع المسيطر و القائد لان هيكون معاك بالاضافة لمفتاح شخصيته، كل مفاتيح العمل و طرق تخليص الاجراءات في الشركة ، في ايدك تخليه يتكلم مع الشخص الص في الوقت الصح بالطريقة الصح و يوصل لهدفه او تسيبه يخبط في الناس و يتعثر الي ان يتعرف عن طريق التجربة و الخطأ ، بعد عمر طويل، علي اسلوب تحقيق اهدافه.
اذن تأكد عزيزي الموظف انك اذا فهمت المدير صح ، ستصبح انت المدير الحقيقي، و ربنا يوفقك.