- Advertisement -

زواج الصالونات او الاقارب هل تتوفر فيه عناصر الحب؟ كتبه المعالج النفسي / حسام بركات

   كتبه المعالج النفسي / حسام بركات 

 عرفنا العناصر التلاتة المكونة للحب  .. (الحميمة – الرغبة – الإلتزام) ..  و قلنا لو ال3 عناصرموجودين يبقى مبروك انت في علاقة حب حافظ عليها على اد ما تقدر .. ولكن ………

لو كانت علاقة فيها عنصر واحد بس من التلاتة دول ؟ هيبقى اسمها ايه ؟ ..

(الحميمية) بس

لو علاقة الحب  احتوت على عنصر (الحميمية) بس او ال Intimacy , اللي هو تشارك للاهتمامات , تبادل المعلومات والحكايات والآراء الشخصية , الشعور انه شخص قريب منك , ولكن مفيش الرغبة ولا التزام تجاه العلاقة , فده هو علاقة الصداقة العادية , مش الانتيم ولكن الصديق القريب منك ومن شخصيتك .. ممكن تكون دي مرحلة الاعجاب المبدئية اللي قد تتحول لحب بعد كده , لكن حتى الآن .. منقدرش نقول عليها حب.

(الرغبة) بس

طيب لو العلاقة فيها العنصر التاني بس .. (الرغبة) Passion  .. مجرد ميل جنسي للطرف الآخر – بيحصل اكتر عند الرجال – ومفيش حميمية ولا التزام , دي العلاقة العابرة واللي بيكون فيها الشخص عايز يقضي وقت لطيف وخلاص , بدون اهتمام بشخص الطرف الآخر , بدون رغبة في تحمل اي مسؤوليات او تبعات .. مجرد رغبة عابرة .. لكن مش حب

(الإلتزام) بس ..

اما لو العلاقة كانت عبارة عن العنصر التالت بس , واللي هو (الإلتزام) Commitment .. يعني مفيش مشاركة وجدانية , مفيش انجذاب جنسي , لكن رغم ذلك احنا ملتزمين تجاه العلاقة وواخدين قرار بالاستمرار ! .. ده بيسموه علماء النفس “العلاقة المفرغة من المعنى” empty love  , وقد يكون أحد المراحل النهائية لعلاقة حب كانت جيدة في البداية , ولكن اصبحت عبء على الطرفين , وبقينا لازم نستمر مع بعض رغم عدم وجود الاهتمام المشترك او الرغبة ولكن مضطرين , علشان الأولاد , أو المظهر الاجتماعي , او اهي عيشة والسلام ونصيبي كده , او اي سبب تاني غير المشاركة الوجدانية والجاذبية الجنسية

زواج الاقارب والمعارف

لكن العجيب في الموضوع ان بعض علاقات الزواج ممكن تبدأ بالعنصر التالت بس , زي مثلا زواج الاقارب والمعارف , واللي بيحصل بشكل سريع بسبب رغبة الاهل في ارتباط ابناءهم في اسرع وقت , فتلاقي الاتنين لسه بيتعرفوا على بعض , ومفيش لسه مشاركة وجدانية Intimacy , مايعرفوش اذا كان هيحصل انجذاب جنسي ولا لاءPassion   , بس بمجرد البدء في اجراءات الزواج بينشأ الإلتزام تجاه العلاقة لاسباب دينية واجتماعية وقانونية .. والعجيب ان الدراسات بتقول ان النوع ده من العلاقات احتمالية استمراره ليست اقل من العلاقات الاخرى اللي توفر فيها العناصر التلاتة من البداية… ايه رايك توافق على الكلام ده ولا لاء ؟

طيب لو العلاقة فيها عنصرين بس في غياب عنصر تالت .. يعني لو مثلا (حميمة + رغبة) أو (رغبة + التزام) أو ( حميمة + التزام) .. هيبقى شكل العلاقة ايه ؟