- Advertisement -

“عشر أنواع من الأصحاب خمسة على الراس وخمسة سياحة” كتبته امانى زيان

 خمسة على الراس

  • الجدعة : الصاحبة الجدعة نعمة ، وقليلة جدا جدا جدا ، والجدعنة تعريفها الصحيح ، ان انسان يبقى بيخدمك أو يقف جنبك دون إنتظار أي مقابل ولا حتى الشكر ، هذا الشخص الجدع يفعل ما يفعله لأنه الصح ، الواجب ، هذا ما تربى عليه وهذا النوع ناااادر للغاية  لدرجة الشك ، فأحيانا من قلتهم تشك دائما في نواياه ، وتسأل نفسك ” هو ولا هي بتعمل كدة ليه ؟ واييييه المقابل ؟” اذا وجدتي صديقة أو الصديق الجدع لا تفرطي فيه أبدا ..
  • الصديق الصدوق : يعني اللي يقولك عيوبك من خوفه عليك ، يواجهك حبا مش تقليلا منك ، لما تغلط يقولك آه انت غلطان ، مش يسبك تتمادى في غلطك أو يساندك ويقويك عليه ، يطبل لك عشانة هو عارف انه هيلف ويغلطك في ضهرك ، الصديق الصدوق ، اللي لما تغضب من أمك ولا أبوك يقولك عيب ، لِم نفسك ، مش يقولك سيب البيت يا عم دول عالم كذا أو كذا ، الصديق الصدوق ده بيسهل الحياة عليك لأنه فعلا مرايا ليك ولتصرفاتك قدام نفسك ، الكائن ده هيخليك أفضل طول الوقت ، ماتزعلش أبدا أنه خايف عليك .
  • أبو دم خفيف : عارفة القرش الأبيض اللي بينفع في اليوم الأسود ، أهو الصوحب او الصاحبة أبو دم خفيف ده هو بالضبط يعامل معاملة القرش الأبيض ، خصوصا في أيامنا الحلوة اللي زي الفحم دي ، ده غصب عنه بينكت حتى في أحلك المواقف ، الطف انسان تحكيله مشاكلك لأنه هيطلع من السواد اللي انت فيه نقطة بيضاء تضحكك ، سيبك من أنه وانت بتحكي وبتعيط أو متعصب هتلاقيه واقع من الضحك ، لكن هو هيعرف يرسم في وشك وقلبك ابتسامة تخفف المك ..
  • الذكي : ده أستاذ التحليل ، وراسم أهم خطط حياتك ، ده اللي هيقولك تعمل ايه وليه وازاي وامتى ، ده وانت بتحكيله مشكلة فجأة تلاقي واحد بيصرخ ويقول لا ، استنى ، لنا هنا وقفة !! عشان قرا اللي بين السطور ، الصديق الذكي ده من أهم أسباب نجاحك في الحياة ، شرير بمواصفات استيفان روستي ، زي السبانخ مش محبوبة بس مفييييييييدة .

خمسة سياحة

  • المنان : ده بقى .. ياااااااه هنفض محتارين يا ترى جدع يا ترى خدوم ؟ لو طلب منك طلب او حصل موقف وانت عندك ظرف او ماقدرتش ، هيبلعك ، هيفضحك ، هيقول حتى على كباية الماية اللي غلط يوم وشربهالك ، منديل الكلينكس اللي خدته منه وانت مناخيرك سايبة في عز البرد ، لحق مناخيرك وساب مناخيره هو سايحة ، هيشرد لك ومش هيواجهك هيقرب من أصحابك عشان يشردلك عندهم .. ده الصاحب بتاع القاعدة الحلوة أوعى يعلم عليك ..
  • الندل : ده بقى لذيذ أوي ، في الخروجات والهيصة والمصالح معاك ، أول ما تبقى في أزمة ، هو مش هينط من المركب .. لا هينط من الطيارة ، ولو مصلحته تضرك ، هيعمل هندي ، برضه هيضحك في وشك عادي جدا ، اضحك في وشه وماتزعلش ، وماتتعشمش .
  • الزنان : الزنان هو نفسه الثرثار ” الرغاي ” ده ياكل عمرك ووقتك أكل ، ممكن حياتك تضيع وانت بتسمعه ، تسمع حكايات وروايات ، أو يزن على طلب ، خد بالك أنه الرفض بالطريقة الغير مباشرة مراعاة لمشاعرة .. مش هيفهمها ، هو أصلا ماعندوش مشاعر ، اجرح مشاعره ، إضرب مشاعره بالشبشب هو هيجرح حياتك كلها .
  • المطبلاتي المطيباتي : ده بقى هيلبسك في الحيط ، الأعمى هيشوف أنك غلط ، وهو أبدا هيقولك إنك صح ، هيعمل كل حاجة تخليك تصدق نفسك ، ومنظرك هيبقى …. وحش ، هيكون سبب في زعل الناس منك ،مش هي دي المشكلة ، المشكلة أن لو حد كلمه يشتكيك .. هيغلطك ويتفاجئ ازاي تعمل كدة أصلا !!!
  • الاستغلالي المتسلق : كل ما سبق كوم وده كوم تاني خالص لأنه ببساطة في كل الصفات التانية بالاضافة للبجاحة ، لأنه شايف أن حقه أنه يحقق أحلامه ، انت بقى عائق في نظرة هيفضل صاحبك وبعدين يدوس عليك ويطلع وبعدين مش هيعرفك تاني لانه هيعرف غيرك ومش هيضيع وقت بقى ويصاحب مليون واحد ، بكرة يصاحب المفيد وهكذا ، لو فكرت تعاتبه ، هيبقى مش فاهم أبدا مطلقا إنت زعلان ليه .. بالنسبة له كل الناس كدة واللي مش كدة شخص غبي !!!