- Advertisement -

مع بداية سنة جديدة :اتعلم كيف تحسب بالورقة و القلم نوع علاقتك بشريكك!

 كتبه المعالج النفسي / حسام بركات 

عرفنا العناصر التلاتة المكونة للحب  في المقال السابق.. (الحميمة – الرغبة – الإلتزام) ..  و قلنا لو ال3 عناصرموجودين يبقى مبروك انت في علاقة حب حافظ عليها على اد ما تقدر .. ولكن ….. طيب لو عملنا تباديل وتوافيق بين عنصرين من التلاتة ووقعنا التالت ؟؟

لو العلاقة فيها عنصرين بس في غياب عنصر تالت .. يعني لو مثلا (حميمة + رغبة) أو (رغبة + التزام) أو ( حميمة + التزام) .. هيبقى شكل العلاقة ايه ؟

دلوقت تفتكروا لو توفر عنصرين مع غياب عنصر تالت بالتبادل , هيكون شكل العلاقة ايه ؟

الحميمية + الرغبة

مثلا لو عندنا الحميمة Intimacy (مشاركة الاهتمامات والآراء الشخصية) , مع الرغبة (الجاذبية الجنسية) Passion  , لكن مفيش اي نوع من الالتزام تجاه الحفاظ على العلاقة واستمرارها لفترة طويلة .. دي هتبقى علاقة حب مراهقة غير مكتملة , حب مفرط في الرومانسية , خالي من المسؤوليات والقرار الحازم بتحمل مسؤولية العلاقة وتبعاتها للنهاية .. ايوة في ميول واهتمامات مشتركة ,  وفي جاذبية جنسية , ولكن العلاقة نفسها معرضة للانهيار لو حصل خلاف بسيط , او لو احد الطرفين بدأ يشعر بالملل وده غالبا بيحصل مهما كان توهج المشاعر في البداية

حميمية مع التزام

طيب لو عندنا حميمية مع التزام Intimacy + Commitment  .. دي علاقة الصديق الأنتيم , بيكون بينا اهتمامات مشتركة , وفي التزام معنوي من كل من الطرفين تجاه الآخر , ده صديقك اللي ممكن يقف جنبك في اي وقت مهما كان مشغول , ومستعد يعمل اي حاجة علشانك .. مفيش انجذاب جنسي هنا .. دي علاقة الصداقة المثالية , وممكن تبقى بين ولد وبنت عادي

رغبة + التزام

النوع الأخير من العلاقات هو لما يبقى الاتنين منجذبين لبعض جنسيا , وفي نية للالتزام تجاه الاستمرار في العلاقة , لكن مفيش مشاركة وجدانية ولا اهتمامات مشتركة .. احنا ملتزمين مع بعض فقط من أجل الجنس .. طبعا بطبيعة الحال صعب جدا ان العلاقة دي تستمر لفترة طويلة , لعدم وجود شئ مشترك بينهم , او مشاركة وجدانية ,  واللي بتدى العمق الانساني والمعنوي للعلاقة. لأن حتى الجنس لو كان من غير مشاعر بيبقى مجرد حركات ميكانيكية مافيهاش روح.

واخيرا لو انت في علاقة متوفر فيها العناصر التلاتة فانت فعلا في علاقة حب حقيقية

دلوقت ممكن تقعد مع نفسك , وتجيب ورقة وقلم , وتشوف كل العلاقات اللي موجودة – او كانت موجودة – في حياتك , وتقدر تحلل العلاقات دي وتحدد طبيعة كل علاقة فيهم .