- Advertisement -

من مشاركات القراء “السعادة بكل معانيها” كتبته إيمان مصطفي

السعادة. ….. ساعات كتير بنفكر هو ايه معنى السعادة؟ وهل ليها معنى محدد أو مفهوم ثابت ينطبق عليه حاجات كتير من خلاله نقدر نقول احنا سعداء وبعد سؤالي لعدة أشخاص حول مفهوم السعادة فاختلفت الآراء لكنها في النهاية صبت في منبع واحد و اختلاف آرائهم ناتج عن اختلاف وجهات نظرهم وتجاربهم المختلفة فمنهم اللي قال السعادة هي السلام النفسي الداخلي ورأي تاني قال السعادة تتحس ماتتوصفش لانها أكبر واصعب من أي وصف معنوي ورأى ثالث واللي إجمع عليها أكثر الآراء بأن السعادة في الرضا باللي ربنا كاتبه لينا وكمان في لمة العيله ودفء حضن الأم والأب، في الطفولة وايامها الحلوة، في مساندة ومساعدة الغير ، في العطاء، ورسم الابتسامة على وجوه الأطفال.

كل دول مفاهيم للسعادة لكني بعتبرها تعريفات جزئية ولأن السعادة معناها أكبر من كل التعريفات دي فبعتقد ان السعادة في الحب الصادق القوى بكل مشتملات الحب دا……. مثلا انا لو بحب عمل معين، فمهما كان العمل دا صعب ،انا بحس بسعادة كبيرة لما بقوم بيه ….ودا لأني بحبه.

الحب من أكبر المفاهيم الإيجابية، بيعتبر زي ضوء الشمس بيكون واضح مانقدرش نداريه أو حتى نخبيه ،فلما بنحس بيه، مش بنقدر نخبيه لأنه ظاهر وطاغي علينا…. ومن خلال الحب بنحس بسعادة غامرة، سعادة منقطعة النظير ،وفي الحالة دي بيقترن الحب مع السعادة …. علشان يشكلوا إحساس رائع جوانا، بنكون كأننا طايرين ومش عايشين على الأرض.

كل حاجة بنحبها بنشعر من خلالها بلذة السعادة ،زي جلوسنا مع ناس بنحبهم ….فبنحس بسعادة منقطعه النظير ، بتبان في عنينا من كثر الحب، ودا عكس لو كنا مع ناس، مش بنحبهم فبيطغي علينا مشاعر الكرة والبغض أو التوتر والملل وبعض الرتابه، ومبتظهرش السعادة هنا.

السعادة كمان بتدخل تحت إطار البساطة …… يعني مش لازم التكلف علشان أكون مبسوطة، زي اني أفضل اقعد مع ناس بحبهم في الشارع أو أي مكان بسيط، ولا اني اقعد مع ناس تقال على قلبي في أفخر الأماكن .

كمان في نقطة تانية للسعادة من خلال إطار البساطة، ممكن أحب أنزل وسط ناس بسيطة عادية…. بلبس عادي …..من غير ما احط أي حاجة في وشي من مكياج ،والف الطرحة عادي من غير أي ترتيب ،وارجع شوية للطفولة، ممكن اقعد على الأرض ……وبنحس أن البساطة بتخلينا نحصل على سعادة الاختلاط مع البسطاء دول سعادة اني أقرب من حياتهم اشوف الرضا والحمد في عيونهم ولحظات الفرح لما نتكلم معاهم وندخل في تفاصيل حياتهم ونسمعهم وهم بيحكوا عن لحظات انتصار ليهم على موقف صعب كان بالنسبة لهم تحدي، ولو هنتكلم بصورة تقريبية شوية كلنا بنحب نروح الريف ونلبس واسع ونروح الزرع ونلمس الحيوانات وناكلهم ونقعد على الأرض. …بنحس بسعادة البساطة وعدم التكلف بننسي التوتر لو الطرحة اتحركت من مكانها أو الجيبه جات عليها حته تراب وهكذا وبنحس أننا رجعنا صغرين من تاني رجعنا لعالم السعادة المطلقة لما كنا بنعمل كل اللي عاوزينه من غير أي خوف. ….كانت فترة ضحك وهزار والأصحاب بجد يمكن هي دي فترة السعادة الحقيقية
السعادة هي حب ربنا والرضا باللي كاتبة لينا فكرة الرضا والاقتناع بالآية دي قل لن يصيبنا إلا ما كتبه الله لنا الآية دي لوحدها كفيلة أنها تمدنا بسعادة وطمأنينة بأن مفيش أي شيء هيصيبنا إلا اللي كاتبه ربنا لينا ولازم يكون عندنا ثقة كبيرة في ربنا بأنه عز وجل هيدينا كل الخير والسعادة
السعادة كمان جزء كبير منها في راحة البال يعني ممكن أسكن في اوضه على السطح ويكون عندي راحة بال وأول ما اجي احط راسي على المخده اروح في سابع نومه احسن ما يكون عندي ملايين وفلوس كتيرة في البنك لكني مشغولة وبفكر على طول هاعمل ايه؟ وعاوزه اشتغل كويس واروح واجي وأكبر الشركة وهكذا دايما خايفة من أن اللي بعدي هيضيعوا الفلوس دي متوترة دايما من الموظفين اللي معندهمش ضمير و….و…..و…..وهكذا ولما اجي انام واحط راسي علي المخده لازم اخد أدوية مضادة للاكتئاب والتوتر ومنومات علشان اعرف أنام
السعادة هي الرضا بأني أكون راضية باللي معايا، بعتقد أن الرضا ليه نسبة أقل من السعادة في الحياة لكن مفعوله أكبر وأطول منها
يعني السعادة بحسها تقاس بالفترة مرحلة وقت معين لكن الرضا بيكون عمر حياة فترة أطول من السعادة فلازم الرضا يكون نابع من الداخل يعني أكون مؤمنة بحياتي ،مشاكلي ،وقدراتي على حلها ، راضية باللي كاتبهولي ربنا وبس
السعادة في صلة الرحم في حب القرايب والأهل واحتضان الأسرة واحتواءهم لينا، السعادة في حضن الأخوات وآلام والأب، في معنى الدفء اللي بيشع من وشوشنا لما بنكون مستكفيين وعندنا حب لبعضنا قوى وكبير، السعادة في أخ يكون سند، في أم محتضنه حنونة، في اخت تكون تؤمي عارفة بفكر فى ايه تقدر تسمعني في وقت ضيق وقادرة على تخفيف اوجاعي، في آب وجوده بس يشعرني بالأمان وإني عايشة مش خايفة من حد ولا حاجة طالما هو موجود
السعادة في اتباع كلام القلب سواء كان حب مكتمل الأطراف ودا بيعتبر أكبر نشوة في السعادة انك تعيش حالة حب حية بتنبض وقادرة انها تعيش عدد لا بأس به من السنوات، تكون بتحب بجد وقادر على التضحية بحياتك لو استلزم الأمر كل دا علشان حبك يعيش ويكمل
انك تشعر بدفء المشاعر اللي جواك تجاه شخص تكون بتحبه والأهم انه كمان بيحبك تكون علاقة فيها صدق ووفاء بالوعد والتزام
السعادة في الخروج والتنزه السفر الشوبنج وقضاء وقت حلو مع أصحاب زمان ومكان جلوسنا لوحدنا نفكر في حاجات كتير جوانا تغيرنا وتبدلنا سواء كان للاحسن أو حتى للأسوأ السعادة كمان في تعلمنا من خلال مواقف أخطأنا فيها لكنها علمتنا دروس عمرنا ما هانقدر ننساها أو حتى نعيد الخطأ مرة اخرى
السعادة في استمتاعي بقراءة كتاب مميز مع كوبايه نسكافيه
وفي النهاية اكتشفت بأن السعادة في كل شيء حولنا بس لو عاوزينها بجد نسعى وراها واكيد هنلاقيها ونحس بيها وسط الحاجات الكتير دي