- Advertisement -

من مشاركات القراء “حاجات تخليكي مبسوطه في حياتك.. اعمليها” كتبته إيمان مصطفي

1- استقلي في بيت لوحدك:
عيشي في بيت لوحدك، كوني مسؤله عن نفسك، اطبخي، واغسلي، اعملي كل حاجة بنفسك، قسمي وقتك واهتمي بكل تفصيله في حياتك لنفسك وبس.

2- اشتغل شغل بتحبي واصرفي على نفسك:
اشتغلي شغل بتحبيه، وحاولي تكبري فيه، اختاري لنفسك مجال تكوني عاوزة تبتدي فيه حياتك المهنية، شقي طريقك بنفسك ، اشتغلي بايديك وحطي لمساتك الأخير على كل حاجة ، حاولي تعملي شيء مميز مختلف عن الباقي، اتعلمي واعرفي كل حاجة عن مجالك ،وطبقي كل المعلومات اللي عرفتيها وسواء كان المجال دا تنظيم أفراح أو تكوني ميكب ارتست، مصممة ازياء، افتحي مطعم أو كافي شوب أو كمان محل للهدايا.

3-روحي الجيم واهتمي بجسمك:
أنزلي الجيم واتمرني وادربي، فرغي طاقتك السلبية في الرياضة، خرجي كل المشاعر السيئة زي الحزن والملل والإحباط، وكمان علشان تظبطي جسمك، وتعرفي تلبسي كل اللى عاوزاه، الرياضة والحركة مهمة جدا للجسم بتدينا مرونة ولياقة وكمان قوة بدنية ،بحيث نقدر نستحمل أي مجهود جسماني متعب.

4- اعملي شوبنج كتير:
ومين فينا مش بتحب تعمل شوبنج؟ التسوق والشراء بيمنحنا سعادة بالذات احنا البنات، البسي على الموضة واكبي كل جديد فيها، نسقي ألوانك وبلاش الغوامق في الصبح، البسي ملابس فاتحة علشان تديكي طاقة إيجابية وإحساس بالسعادة اكتر.

5- ادخلي في حالة حب:
الحب دوامة جميلة بتخلينا نشوف الحياة بشكل رائع… كلها ألوان واغانى وفرحة منتشرة في الجو، البنت لما بتحب بتبان السعادة على وشها، فلو لقيتي شخص مناسب بيحبك ماتتردديش وحبيه.
الحب بيكمل حياة البنت، ودا لان قلبها ضعيف قدام الوحدة ،مابيقدرش يعيش فترة طويلة لوحده، دايما بيدور على قلب تاني يشاركه حياته علشان الحياة تحلو.