١٥ ميزة لزمن الكورونا بقلم ا- غادة حامد

بعد اقتراب انتهاء الكورونا أخيرا .. بعد سنتين عشناهم معاها و بعد ما اطمنت انها  بعتت الميكرون يسلم علينا  نفر نفر قبل ما تودعنا .. .. احب افكر معاكم الكورونا علمتنا ايه و ١٥ ميزة لزمن الكورونا  ..

١٥ ميزة لزمن الكورونا

  1. الكورونا علمتنا نتخلي شويه عن رغبة الانسان الفطرية في السيطرة
    و ان الكون مش تحت سيطرتنا و ان خططنا مش شرط تتحقق خالص دي مجرد امنيات .. مهما درسناها
  2. علمتنا نقلل توقعاتنا ..كل الوقت اللي قضيناه في توقع حاجات هتحصل هو وقت ضايع من عداد عمرنا
  3. اتعلمنا نبعد عن بعض شوية و نبص علي الصورة من بعيد و نراجع مشاعرنا ناحية الناس اللي حوالينا و نحدد بترميز اكتر مين اللي فعلا يفرق معانا نقابله و نعرض حياتنا و حياة اسرنا للخطر و مين اللي وقع مننا او نزل درجة تانية
  4. اتعلمنا نراجع نظام حياتنا كله و نسأل نفسنا سؤال عميق جدا
    ( هو انا فعلا عايز ارجع لنفس الحياة اللي كنت باشتكي منها ليل نهار؟ او هل عايز ارجع فعلا لنفس الحياة اللي كنت فاكر انها سعيدة؟)
    عايز اغير ايه و اخلي ايه ؟ عايز اشطب علي مين و احط خطين تحت اسم مين للاهمية ؟
  5. اجبرتنا نطلع من الكمفورت زوون بتاعنا و نجرب حاجات ما كانتش نتوقع انها ممكن تتغير لأننا اعتدناها
  6. رجعتنا ييجي ١٠٠ سنة لورا قبل وجود حلاق او كوافير ، قبل وجود مطاعم و كافيهات ،
    قبل وجود ناس بتشتغل في بيوتنا .. اضطرت الست تتعلم تظبط سكلها بنفسها
    من اول الباديكير لغاية الصيغة و في نفس الوقت تطبخ ٣ او ٤ وحبات من اول سندوتشات الجبنة بطماطم
    الي المحاشي الي اختراع اصناف جديدة عمرها  ما دخلت البيت و اضطر الراجل يمشي ايده في المطبخ
    ويساعد في البيت و يذاكر للعيال او حتي يسكتهم عشان امهم وراها حاجات تانيه و اضطر يطبخ و يحلق لنفسه و غيره
  7. اضطرينا نعرف اسرنا بشكل اقرب و نتلم معاهم ادام تليفزيون واحد و نقرب منهم واحد واحد
  8. علمتنا أهمية الحياة الاجتماعية واهمية كل شخص كنا بنقابله من اول البواب لحد زمايلنا في الشغل
    و حتي منظر الناس وهي ماشيه في الشارع .. اتعلمنا ان احنا مخلوقات اجتماعية بطبعها
  9. طلعت مننا مواهب ما كناش عارفين انها جوانا او ما كناش لاحقين نعملها
  10. عرفتنا علي نفسنا اكتر و اضطرتنا نخلق لنفسنا me time نقعد فيه لوحدنا
  11. علمتنا يعني ايه  امتنان و شكر و علمتنا برضه يعني ايه قلق وتوتر
    و ازاي ان التاني بيحمي من الأول
    و معاني كتير ما فكرناش فيها
  12. عرفتنا قيمة عصر  التكنولوجيا اللي لولاهم كنا عانينا اكتر بكتير من العزلة
  13. فكرتنا بقيمة اشغال كتيرة زي الاعلام و الطب و علوم الكمبيوتر
  14. علمتنا نهتم بصحتنا و نرفع مناعتنا و نحافظ علي انفسنا و زودت وعينا يمكن ١٠ اضعاف الأول ،
    بقينا نقرا ونهتم بكل ما يفيد صحتنا خصوصا اما شفنا ناس غالية علينا بيقعوا واحد ورا واحد
  15. علمتنا نتاكد من مصدر المعلومات اللي بتوصلنا و ما نروحش معلوومات مغلوطة ترعب و تلخبط غيرنا