- Advertisement -

3 عناصر للحب.. لو موجودة يبقي مبروك انت في علاقة حب

كتبه / حسام بركات

ايه هو الحب ؟

ورغم ان كل واحد فينا عنده تعريفه الخاص للحب ,  لكن تعالوا نشوف رأي علماء النفس: العلماء لقوا ان الحب هو مزيج من 3 عناصر لابد ان تجتمع وتتكامل عند الطرفين بحيث اذا توفرت في علاقة نقدر نسميها علاقة حب فعلا , ال3 عناصر دول هم: الحميمية – الرغبة – الإلتزام أو Intimacy, Passion, Commitment

ايه عناصر الحب:

لو عندك ال3 حاجات دول في علاقة , تبقى علاقة حب .. لو عندك حاجة واحدة او حاجتين فهي تظل علاقة , لكن ليها مسميات اخرى هنعرفها في المقال  القادم, ولكن ما نقدرش نقول انها علاقة حب .. تعالوا نتكلم عن كل عنصر من العناصر التلاته باختصار: الحميمية – الرغبة – الإلتزام

  1. الحميمية أو ال Intimacy ..

هي الشعور بالتقارب والتفاهم ومشاركة الاهتمامات والافكار , واحيانا مشاركة الأسرار مع شخص آخر .. علشان كده بيقولوا صديق حميم يعني صديق قريب , لانك بتشاركه هو تحديدا بحاجات ممكن ما تقدرش تشاركها مع حد تاني

  1. الرغبة أو ال Passion ..

العلماء بيقولوا ان شرط اساسي لوجود علاقة حب رومانسي هو وجود ميل جنسي او انجذاب جسدي من كلا الطرفين تجاه الطرف الآخر , طبعا الموضوع فيه اختلاف كبير بين الرجل والمرأة , خصوصا ان ده يعتبر من اهم الحاجات اللي بتلفت نظر الرجل في بداية العلاقة , بينما المرأة ليها اولويات اخرى في البدايات وبتبدأ الرغبة عندها في مراحل متقدمة من العلاقة , ولكن المرأة هي كمان محتاجة تشعر بالانجذاب الجنسي للرجل في مرحلة ما من مراحل علاقة الحب , ولو ده محصلش يبقى في خلل في علاقة الحب ولسه لم تكتمل .. نفس الكلام بالنسبة للرجل

  1. الإلتزام أو ال Commitment..

 هو ببساطة القرار انك تحافظ على العلاقة دي مهما حصل , هو الالتزام تجاه الطرف الاخر وتجاه العلاقة نفسها , هو الاستعداد لبذل الجهد والمحاولات الجادة للتفهم وتقريب وجاهات النظر واحيانا تقديم التضحيات علشان العلاقة اللي بينكم تستمر مهما كانت الظروف والملابسات .. مش في الوقت الحلو ابقى حلو وفي الوقت الوحش اقول ماليش دعوة انا مش عاوز اكمل.

دي العناصر التلاتة المكونة للحب .. (الحميمة – الرغبة – الإلتزام) .. لو موجودين يبقى مبروك انت في علاقة حب حافظ عليها على اد ما تقدر .. ولكن ………

لو كانت علاقة فيها عنصر واحد بس من التلاتة دول ؟ هيبقى اسمها ايه ؟ .. طيب لو عملنا تباديل وتوافيق بين عنصرين من التلاتة ووقعنا التالت ؟؟

يتبع الجزء التاني كيف تعرف بالورقة والقلم نوع علاقتك بشريكك ؟